د کانونو او پټرولیم وزارت او د استخراجي صنایعو د نوښت د نړیوال سازمان سکرتریت د مشرانو ترمنځ غونډه ترسره شوه

 
د کانونو او پټرولیم وزارت سرپرست محمد هارون چخانسوري نن سهار د استخراجي صنایعو د شفافیت نوښت سازمان له اجراییه رئیس ښاغلی مارک روبنسن سره د ویډیوکنفرانس له لارې د شفافیت د نوښت په سازمان کې د افغانستان د بیاځلې اعتبار اخیستنې په اړه خبرې وکړې.
 
په پیل کې ښاغلي روبنسن د افغانستان له هلوځلو قدرداني وکړه او د تېرو ۱۸ میاشتو په موده کې یې د افغانستان د پرمختګونو ستاینه وکړه او ډاډ یې ورکړ چې د جینیوا د کنفرانس څخه مخکې به د افغانستان د غړیتوب څرنګوالی روښانه شي.
 
د کانونو او پټرولیم وزارت سرپرست محمد هارون چخانسوري د شفافیت د نوښت سازمان له همکاریو د مننې ترڅنګ وویل چې، د افغانستان حکومت د شفافیت ټینګښت ته ژمن دی او په دغه برخه کې د شفافیت د نوښت سازمان ته د هر ډول همکاریو ډاډګیرنه ورکوي.
هغه همداراز د اووم پړاو راپور د چمتووالي په اړه خبرې وکړې او زیاته یې کړه چې، د اووم پړاو راپور د برابرولو لپاره د موادو په راټولولو کار شوی او ډېر ژر به چمتو شي. 
 
د غونډې په ترڅ کې د اووم پړاو راپور ترڅنګ د جینیوا کنفرانس لپاره د چمتووالي په اړه هم بحث او خبرې وشوې.